Antibiotic Footprint ត្រូវបានលើកឡើងថា ជារង្វាស់សកលមួយដែលបរិយាយអំពីបរិមាណសរុប នៃការប្រើប្រាស់ឱសថអង់ទីប៊ីយោទិកនៅលើមនុស្ស និងផ្នែកបសុសត្វ ដែលប៉ះពាល់ដល់ប្រព័ន្ធអេកូឡូស៊ី។ [១] ‘Carbon footprint’ និង ‘Antibiotic footprint’ ត្រូវបានគេសម្គាល់ឃើញមានលក្ខណៈស្រដៀងគ្នា (រូបភាពទី១) ។ ខណៈដែលយើងគ្រប់គ្នាប្រើប្រាស់កម្លាំងថាមពលដើម្បីរស់រានមានជីវិត ការប្រើប្រាស់ផូស៊ីលឥន្ធនៈយ៉ាងច្រើនសន្ធឹកសន្ធាប់បានជំរុញឱ្យមានការផ្លាស់ប្ដូរអាកាសធាតុពិភពលោកផងដែរ។ ដូចគ្នានេះដែរ ខណៈពេលដែលយើងប្រើប្រាស់ឱសថអង់ទីប៊ីយោទិក ដើម្បីប្រឆាំងនឹងការបង្ករោគដោយបាក់តេរី ការប្រើប្រាស់ឱសថអង់ទីប៊ីយោទិកលើសកម្រិត និងមិនត្រឹមត្រូវ បានជំរុញឱ្យបាក់តេរីទាំងនោះក្លាយជាមេរោគស៊ាំនឹងឱសថច្រើនមុខ (Superbugs) ដែលជាបាក់តេរីស៊ាំទៅនឹងឱសថអង់ទីប៊ីយោទិកច្រើនប្រភេទ។
រូបភាពទី១: Carbon Footprint (ខាងឆ្វេង) និង Antibiotic Footprint (ខាងស្ដាំ)
ប្រសិនបើគ្មានសកម្មភាពជាសកល ដើម្បីកាត់បន្ថយការប្រើប្រាស់ឱសថអង់ទីប៊ីយោទិកនោះទេ មនុស្សជាច្រើននឹងត្រូវស្លាប់ដោយមេរោគស៊ាំនឹងឱសថច្រើនមុខដ៏សាហាវនេះ។ Antibiotic Footprint ក៏មានគោលបំណងវាស់វែងបរិមាណសរុប នៃការប្រើប្រាស់ឱសថអង់ទីប៊ីយោទិកនៅគ្រប់សកម្មភាពរបស់មនុស្សដោយផ្ទាល់នៅក្នុងសហគមន៍ មន្ទីរពេទ្យ និងដោយប្រយោលក្នុងផលិតផលកសិកម្មផងដែរ។
Antibiotic Footprint នៃប្រទេសមួយអាចប៉ាន់ប្រមាណពីចំនួនប្រើប្រាស់ឱសថអង់ទីប៊ីយោទិកសរុបនៅលើមនុស្ស និងសត្វ (រូបភាពទី២)។ ការប្រើប្រាស់ឱសថអង់ទីប៊ីយោទិកនៅក្នុងវិស័យកសិកម្ម ជាផ្នែកមួយសំខាន់របស់ Antibiotic Footprint ពីព្រោះឱសថអង់ទីប៊ីយោទិកជាច្រើនត្រូវបានគេយកទៅផ្ដល់ជាចំណីសត្វ ហើយហូរចូលក្នុងប្រព័ន្ធលូទឹកស្អុយ និងប្រភពទឹកផ្សេងទៀត ដោយមិនបានបន្សុទ្ធដែលធ្វើឱ្យមានការកើនឡើងបាក់តេរីស៊ាំនឹងឱសថអង់ទីប៊ីយោទិកនៅក្នុងបរិស្ថាន។
រូបភាពទី២៖ Antibiotic Footprints សកល តាមប្រទេសនៅឆ្នាំ២០១៥
ចូរស្វែងរកបន្ថែមអំពី “Antibiotic Footprint” នៅលើគេហទំព័រ www.antibioticfootprint.net
ពាក្យទាក់ទង៖ ការប្រើប្រាស់ឱសថអង់ទីប៊ីយោទិកលើសកម្រិត ការប្រើប្រាស់ឱសថអង់ទីប៊ីយោទិកមិនត្រឹមត្រូវ
សេចក្ដីយោង
1 Limmathurotsakul, D., Sandoe, J. A., Barrett, D. C., Corley, M., Hsu, L. Y., Mendelson, M., . . . Howard, P. (2019). ‘Antibiotic footprint’ as a communication tool to aid reduction of antibiotic consumption. Journal of Antimicrobial Chemotherapy. doi:10.1093/jac/dkz185
2 AntibioticFootprint. (n.d.). Retrieved from http://www.antibioticfootprint.net/